ភ្នំពេញ៖ តារាចម្រៀងដែលទទួលការកោតសរសើរពីសម្ដេចតេជោថាច្រៀងពិរោះលោក ពេជ្រ រដ្ឋា បានទទួលមរណភាពហើយដោយសារគ្រោះថ្នាក់ចរាចរណ៍។ នេះបើយោងតាមការផ្សាយរបស់ក្រុមព្រះសុរិយានៅព្រឹកថ្ងៃពុធ ទី២៩ ខែវិច្ឆិកានេះ។

ក្រុមព្រះសុរិយាបានចុះផ្សាយថា៖ «ដំណឹងរន្ធត់ចិត្តណាស់ លោក Pich Ratha ជាអ្នកចម្រៀង ដែលសម្តេចអគ្គមហាសេនាបតីតេជោ ហ៊ុន សែន ពេញចិត្តនូវទឹមដមសំឡេង បានទទួលមរណភាពហេីយដោយគ្រោះថ្នាក់ចរាចរណ៍។ សូមចូលរួមសោកស្តាយស្រណោះ និងរំលែកទុក្ខចំពោះមរណភាព លោក ពេជ្រ រដ្ឋា តារាចម្រៀងនៅស្រុកភ្នំក្រវាញ សូមវិញ្ញាណក្ខ័ន្ធលោកបានទៅកាន់សុគតិភព»។

ជាមួយគ្នានេះក្រុមតន្ត្រីចេវដែលលោក ពេជ្រ រដ្ឋា ច្រៀងក្នុងក្រុមនេះបានសរសេរផងដែរថា ពិតជាសោយស្តាយជាទីបំផុតនៅការបាត់បង់លោក ពេជ្រ រដ្ឋា។

ក្រុមតន្ត្រីសរសេរថា៖ «ពួកយើងទាំងអស់គ្នាពិតជាសោយស្តាយនៅការបាត់បង់ធនធានមនុស្សល្អម្នាក់ គាត់ស្លូត សំដី សំដៅគាត់ពីរោះណាស់ ហាក់បីដូចជាលឿនពេកហើយ ទើបតែជួបគ្នា ២ថ្ងៃមុនសោះ»។

គួរដឹងផងដែរថា លោក ពេជ្រ រដ្ឋា គឺជាតារាចម្រៀងដែលបានច្រៀងបង្ហោះនៅតាមបណ្ដាញសង្គម Youtube និងទទួលបានការចាប់អារម្មណ៍ជាខ្លាំងពីអតីតនាយករដ្ឋមន្ត្រីកម្ពុជា សម្ដេចតេជោ ហ៊ុន សែន ។ សម្ដេចបានលើកសរសើរដោយចំៗចំពោះលោកនៅតាមវេទិកាសាធារណៈ និងបានហៅលោកមកច្រៀងនៅក្នុងកម្មវិធីរបស់សម្ដេចមួយចំនួនផងដែរ៕